© DAV Peißenberg

Wanderrundn vo Fischbach zua Isar

30.10.2026

Fischbach – kenn i ned, wo liegt na des? Da war i ja no nia!

Am 30.10.2026 samma mit öif (11) Leit oafach amoi do hig'fahr'n, daß ma woaß, daß's des gibt und wo des liegt. Was neis zum sehng is nia schlecht. Daß des zu Wackersberg bei Töiz ghert, hätt i net denkt, aba 's is a so, zwecks de Jungmoränen (des san koane Viecha, sondan de Landschaftshügl aus irgendoana Eiszeit, wöiche, woaß i nimma, is scho so lang her), de si vo Wackersberg Richtung Minga hig'legt ham. 

Und durch de Buckln auf und ab samma hoit zua Isar in Töiz ganga, weil ma a Wassa aa sehng woit'n. A kurze Brotzeitpaus'n und nacha war's gnua mit'm Wassa und samma weita marschiert, eini in an dunkeln Woid zu am vasteckt'n Heisal – hot si koana fürcht'n brauch'n, koa Hex war ned da. Na samm no zua DAV-Hütt'n Haunleiten kemma – a Söibstvasorgahütt'n, wo s'd nix zum trink'n oda ess'n kriagst, hat uns oiso gar net intressiert – samma glei g'flücht'. Kurz drauf beim Wegweisa "Prösteln" ham's es auf oimoi eilig g'habt, dawei hat des gar nix mit Bia oda Wein zum toa – so ko ma si teisch'n, ha! Aba auf'm Prösteln-Hügl ham ma a guate Aussicht g'habt, sogar unsan Hohen Peißenberg host aa ohne Adleraug'n daspecht'n kenna. Und am End ham ma dann doch no "Prost" g'macht beim Wirt in Fischbach. Und alle san glückli, daß s'  jetz wiss'n, daß's und wo's des Kaff gibt und wia ma do hi find't, daß de Jungmöränen koane Viecha san, und ...., und daß s' was dazuag'lernt ham. Bis zum nachst'n moi, weil ma leant ja nia aus!